Bread and Bistro (已結業)

而家每次入去黄竹坑都有遠征嘅感覺，以前無鐵路通常都撘巴士，不過嗰條隨道每到放工時間六點幾硬係要塞一塞，無論你六點定六點半上車，都事必起碼塞到七點先出到去⋯⋯今次係中午時份入去算好啲，辦完公事約吓啲舊同事食飯，揀左哩間Bread & Bistro，Café模式嘅餐廳。佢個午餐都唔平，平均都100蚊起，響One Island South嗰幾間餐廳都係咁嘅價錢。然後啲舊同事話響度放工咁耐，居然無食過哩間餐廳，仲要唔知道佢邊，我諗佢地都係帶飯帶太多喇！睇睇個午餐餐牌，都幾多嘢揀，沙律、意粉、咖喱飯、烏冬等等，完全係洋食格局。見到佢個日式原條鰻魚飯配炒蛋飯都幾吸引，午餐仲會跟個沙律或湯，細細碗，唔係重點，表過不提。同啲舊同事傾左陣就上菜。條鰻魚都真係幾大條，差不多一隻半手掌咁長，唔駛圖片只供參考（而其他食物都同圖片相乎），份量足夠配白飯有餘，幾鐘意佢個炒蛋，炒得都幾滑呀，不過略嫌鰻魚汁太少，至於味道就一般合格啦，同一般真係日本（連鎖式）餐廳差不多。