火夫

營業中

休息中

近排成日喺social media都見到有人post依個麵，雖然住附近不過都真係冇乜衝動行入去食。見啲人話午市抵食，趁星期五放假就帶埋娘親去試下。麵食有7款選擇，大部分都要另外加錢。咁當然點都要試下依個虎蝦濃湯麵(+$50)啦，另外仲叫左雞白湯素麵(+$10)。個人認為鍾意食沾麵的話應該會幾喜歡虎蝦濃湯麵，佢個湯濃稠到扣住個麵，每一啖都食到個蝦湯味。隻大蝦外層包住左好多櫻花蝦再拎去炸，好香嘅蝦味，蝦肉都算爽口。雞白湯素麵就比較清淡，麵條好幼不過有啲太淋，漿住漿住口感一般，比較喜歡佢用返拉麵。配料有幾片雞卷同一隻溏心蛋，有少少醬油嘅甜味同酒香味，都算唔錯。串燒就揀左鹽燒手羽中(+$2)、燒牛柳粒(+$2)、櫻花蝦豆腐同蟹肉牡蠣(+2)。串燒正常不過就食唔出平時食串燒燒出黎果種焦香味，牛柳有少少過火有啲韌，雞翼都係燒到好乾冇乜肉汁，櫻花蝦豆腐同炸虎蝦異曲同工，不過豆腐唔滑冇乜豆香。最值得推介就係個蟹肉牡蠣，連一向要求高嘅娘親大人都讚不絕口。餐飲只有凍飲選擇，想要杯熱水都冇，建議有熱茶或者熱飲供應。整體黎講可以試下嘅，但如果要等30分鐘以上的話，我會寧願食隔離嘅原作養生湯米線。