有鑊氣-酸菜魚 (醫局街)

營業中

休息中

其實已經好少食大排檔feel嘅小炒晚餐，我去完沙灘同朋友一齊嚟到深水埗，竟然有意想不到嘅收穫。話說我哋星期六6:30到達，餐廳已經坐到九成門，都知道應該有信心保證。一開始即刻叫咗杏汁豬肺湯，湯好飲湯渣好食。酸菜魚係招牌菜，自然不負眾望。最令人喜出望外嘅係小炒王，炒得夠乾身，上邊嘅炸魚仔同腰果好脆好香，火候夠又炒得啱啱好韭菜好嫩，必叫！麻辣雞煲一般OK，送飯都唔錯。梅菜炒牛肉菜心，可能因為用咗火鍋肥牛，而唔係新鮮牛肉，同埋菜心唔係一齊炒，食落去麻麻哋，絕對有改善空間。杯超級檸檬茶好似魚缸咁大杯，叫咗佢唔使再飲其他嘢，絕對抵飲。總括而言，係好食，不過記住要訂位。