名館 (已結業)

其實希慎頂層有好多中餐食，而且有唔少質素都係高既，今次就帶屋企人黎食呢間長期都要排隊既名館。芥末咸水角 咸水角餡料豐富，加左芥末又出乎意料地夾，平時覺得食咸水角好膩，但個芥末刺激完個口腔好似中和左d油膩感咁。厚切叉燒皇叉燒成寸厚，名副其實既厚切。叉燒燒得好香，最鍾意佢外層d焦，内裏肉質香濃，入口鬆軟。雞翼釀糯米雞翼炸到外層香脆，内裏肉質嫩滑。市面上其實都好多無骨雞翼，不過呢個加左炸糯米，加多左層口感。黑金蒜扣豬手好欣賞佢上菜既時候係連埋個火，一路食仲一路暖住個豬手，因爲豬手凍左真係唔好食。豬手燜到好淋，d醋同蒜頭味道完全入曬豬手度。魚米之鄉 將原條魚拆骨起肉再拎去炒飯，d飯見到係粒粒分明。旁邊仲有d炸魚塊，炸得金黃香脆，肉質又唔會話好散。七彩不切糕 原來不切糕係傳統既中國小食黎，但一直都無食過。望落覺得幾得意，食落味道清甜，當飯後甜品係幾好。總括而言，食物質素係高級既，美中不足既係上菜既次序可以改善下。