周記點心 (流心點心)

營業中

休息中

有一次上想去周記點心食，但見到門口有好多人排隊，所以冇食到。今日未到1:00，本身想去隔籬街食海南雞飯，但見到周記點心唔使排隊就轉食周記點心喇。入到去，店員招呼咗我哋兩個坐喺二人位，叫我哋喺QR code落單。我哋叫咗六個點心，包括蝦多士，鹹水角，牛肚，咖喱魷魚，糯米包同埋燒賣。過咗冇幾耐，點心就陸陸續續咁嚟喇。蝦多士：一碟有四件，好大件，但係咬麵包時覺得啲油唧出嚟。鹹水角：造型好可愛。表皮係煙煙韌韌嗰隻，唔係好脆口嗰隻，唔係好啱我口味。牛肚：一碟大概有七件牛肚加兩件麵筋。食得出香料味，牛肚夠林夠入味，好食。咖喱魷魚：好大碟。咖喱味香濃。入面有大概三四件麵筋。糯米包：好少地方有得食糯米包。糯米飯軟硬度適中，辣味好香。個皮好薄。好味。燒賣：豬肉有少少鞋口，味道一般。我哋食食吓先發現舖頭唔似一般茶樓咁樣又有收茶介，所以我哋只係叫咗兩杯水（我哋兩個都唔係太好茶）。如果你哋想飲茶就可以加錢叫。