新光粥店 (已結業)

唔知係咪真係昨日食左雞, 喺禽流感嘅刺激下, 師傅今日終於病倒了! 但係病左都要食野架, 於是乎師傅就黎左呢度食個清清地嘅早餐, 之後再返去休息下!一間相當歷史悠久嘅食店, 多年黎始終如一! 環境真係普普通通, 招呼真係冇咩, 只不過係隨住時代嘅改變而增加左冷氣! 入到去店內, 師傅自己求其搵個位坐, 之後睇下食咩好, 最後就要左碗艇仔粥同一碟齋腸!話都冇咁快兩樣野都擺左喺師傅面前, 於是師傅先試下個粥, 發覺粥底唔算綿, 加上唔知係師傅口淡淡定咩啦, 覺得粥係冇咩味, 而豬皮就幾硬, 唔好味, 魷魚就好爽口, 唔錯, 而碎牛肉都幾好, 可以! 再試下齋腸, 齋腸本身都算幾滑, 不過始終唔夠"腸粉王"好味, 而豉油都幾香, 好味; 而甜醬, 麻醬都係自己落, 豐儉由人!總括黎講食物質素相比兒時真係差左好多, 勉強仍可接受; 衛生情況就麻麻, 師傅見到煮粥嗰位執配料手套都唔帶, 就覺得好污漕; 而價錢真係好平, 十蚊碗艇仔粥, 五蚊碟齋腸, 白粥都係四蚊碗, 係抵食不過唔叫好食! 食飽後師傅發覺都幾口渴, 相信食物裡都有唔少味精, 晨早流流本來諗住食個清清地嘅早餐, 點知就食左個味精早餐