新泰東南亞餐廳

營業中

休息中

平時出去食飯都鐘情於泰國菜，因為泰菜夠香口，又惹味好啱我嘅口味。平時食泰國通常都揀九龍城，貪佢選擇多又夠地道，但位置就比較隔涉。估唔到今次朋友帶我嚟到尖沙咀食咗一間令我喜出望外嘅泰國餐廳。首先佢個位置好方便，就係加拿分道。又有好多卡位，有啲仲係窗口卡位添，感覺好舒服。講返佢個餐牌，一打開真係有好多選擇，乜都想食，小食、炸物、湯、煲仔類，應有盡有，上枱碟碟都好夠份量，二個人食真係食到抱住個肚走。泰式柚子蝦沙律，柚子清甜唔太酸、大蝦鮮味之餘，絕對係清新開胃之選。泰式炸蝦餅好食到唔記得影相，炸皮鬆脆、蝦肉彈牙，仲好香蝦味，份量足夠，大家唔怕唔夠喉。燒原隻魷魚，燒得唔會太乾太韌，又夠新鮮，加埋佢個醬汁酸甜帶辣，真係食唔停口。馬拉盞通菜，通菜夠嫩同脆口、炒得夠晒夠火，又香又惹味，最重要要係唔會太油。泰式明爐烏頭，賣相不但夠吸引、連配菜都好入味，仲有碗湯跟埋，唔怕食食吓唔夠湯；烏頭好新鮮，唔會帶有腥或泥味，唔駛點辣汁都好夠味。鍾意食魚嘅人依個係必點之選。