OPPA Coffee Bar Restaurant

營業中

休息中

忽然又宣布禁晚市堂食，即刻約個一月之星最後衝刺食返餐，就揀咗尖沙咀韓國街其中一間龍店OPPA Coffee Bar Restaurant。嚟呢度朝聖，當然要食佢哋最招牌嘅蛋漿熔岩炒飯，我哋揀咗秘製章魚蛋漿熔岩炒飯，店員會喺食客面前製作整個熔岩炒飯，成個過程簡直係一個表演。店員首先將蛋漿倒落炒飯之上。然後再灑上芝士。跟住就用火槍猛烈射向蛋漿同芝士之上。然後就快速地撈勻，芝士炒飯仲有拉絲效果。因為我哋揀咗秘製章魚，所以更加充滿鹹香，混合滑蛋同拉絲芝士一齊食，非常惹味。另外我哋仲揀咗泡菜五花腩湯，入面有大片五花腩。除咗泡菜，另外仲有洋蔥絲，酸酸辣辣夠開胃。食韓國菜食炸雞是常識吧！我哋揀咗蒜香無骨炸雞，炸雞上灑上蒜粒，亦見有蒜片，啖啖充滿蒜香。除咗有炸雞，下面仲有沾有醬汁嘅薯條，份外滋味。炸雞仲配有醃蘿蔔，可以清一清口腔，減去油膩感，咁就更加開胃。呢間OPPA Coffee Bar Restaurant味道果然有特色，難怪有咁多人追捧。