祥利飯店 (已結業)

晚上去朋友屋企飲酒，要買野餸酒，夜晚十一点幾，其實選擇真係唔係咁多，由莊士敦道轉入三角街，統於揾倒啲可以餸酒嘅野喇，潮式鹵水！間野叫祥利飯店，望下的野都過得去，問斬料師傅: 半隻鹵水鵝幾錢？師傅話: 要問下喎。跟住佢問店內一男子，個男子答: 半隻要500 蚊。咩話？中環鏞記燒鵝都唔使咁貴喎！跟住我問：例牌幾錢？師傅話：75蚊。心諗: 合理！叫左一個鹵鵝例牌，同一個鹵水併盆。見住個師傅斬呀斬，發覺佢擺左差不多三份一邊鵝人盒度，就。心諗: 75蚊三份一邊鵝，但點解半隻要500蚊？呢條數我計到今日都計唔惦。返到去開盒食喇，鵝唔鞋唔靱，但肉味同鹵味都麻麻，鹵水可以話唔香，最多只係合格。到盒鹵水併盆，好豐富，有:豬大腸、生腸、鵝腸、豬頸肉、鴨腎、墨魚及紅腸等等，鹵水香味偏弱，但呢啲野都能做到應爽嘅爽，應焾則焾，叫做唔錯啦！總結：咁夜150蚊買倒兩大盒野餸酒，都叫做倒野喇！