尚素 (已結業)

最近成日出街食飯，不過因為之前食過幾次素食都麻麻地，所以都好食素食素。 今日難得媽媽開到口，就陪佢黎到呢到試試佢。 觀塘工業區呢邊既餐廳好多都唔太大間，所以呢到都比想像中寬闊同舒服。 呢到既好處係有Dinner Set，而且前菜 、主菜同埋飯麵類都有好多款揀，抵食得黎又彈性高。  今次黎我地仲好好彩，可以免費多湯升級做羊肚菌燉湯，羊肚菌燉湯都幾足料，而且唔似出面既燉湯咁油，清清地好好飲。 前菜我地揀左山葵香木耳沙律同埋椒鹽鮮魷。 先係山葵香木耳沙律，木耳好爽口同好滑，配埋有少少 Wasabi 味既沙律醬感覺都幾清新。 至於椒鹽鮮魷呢，可謂全晚最有驚喜既一味餸！椒鹽鮮魷外表炸至金黃香脆，而且有好香既椒鹽味，至於肉質都同真鮮魷好相似，而且爽口得黎冇咁韌，仲有陣清甜味，我地都覺得佢係椰子肉黎。呢個松茸炒桂花翅其實姐係松茸炒佢翅，要讚既係佢既仿翅都幾粗同煙韌，唔好好淋，而且都炒得好香同幾惹味，不過就炒得油左少少。呢個牛肝菌炒飯就唔會太油喇，而且好香菇菌味，加埋啲Nuts清得黎都 好香口。最後佢地仲送左糖水，木瓜燉雪耳，清甜滋潤，用黎結尾一流。