美味的泰國菜餐廳 (已搬遷) 新店位置

呢間泰國菜店名就叫美味的泰國菜餐廳，名稱簡單直接。呢間係家庭式小店，由泰國人主理， 甚有風味。主要都係製作傳統泰國菜式，基本菜式應有盡有。泰式豬頸肉沙律有生菜絲、洋蔥絲、蕃茄等等，泰式醬汁小辣醒神開胃，而且佢嘅豬頸肉份量相當豐富，非常抵食。食泰國菜我就一定要食泰式炸蝦餅，四大件蝦餅開半，整齊排列，蝦餅熱辣辣又夠彈牙，點埋甜酸醬就真係冇得彈。嚟到係午餐時間，所以有午市套餐供應，我哋就揀咗泰式海鮮炒寬粉。海鮮材料豐富，包括有蝦、魷魚、青口，配合其他蔬菜同菇菌，非常豐富。而我就特別推介呢個寬粉，寬粉大大片呈半透明狀，薄身得嚟又夠煙韌，口感一流！馬拉盞炒通菜同樣都係大大碟，佢嘅馬拉盞就比一般平時食到嘅淡口，相對冇咁鹹，所以我覺得都幾唔錯。最後當然係芒果糯米飯做甜品啦，佢係選用泰國芒果，芒果比較清甜唔會帶酸，糯米飯帶有班蘭香味，再加入椰汁一齊食真係無懈可擊。午市套餐包埋飲品，泰式奶茶都唔需要另外加錢，呢杯奶茶好香好滑又唔太甜，真係超好味！小店同時亦都有售賣泰國零食，買返幾樽當自己去完泰國㗎喇！