釜之魂釜飯專門店 (淘大商場) (已結業)

呢間新開冇耐，每次經過都好多人，今次終於決心是一次！夜晚7:15左右到，排咗大概15分鐘，其實裏面都算多位，所以叫號碼都叫得幾快。門口個Menu唔係全部，坐低之後嗰本Menu有多啲小食。話明係鰻魚釜飯專門店，就梗係要是最厚嘅鰻魚啦，之後見到汁燒牛肉釜飯都好似幾吸引，小食又有甜番薯，甜品又有蕨餅，所以就叫咗好多嘢，食到好飽。Dinner的時段，釜飯+$18可以做套餐有湯、嘢飲和前菜，釜飯亦可以+$18變茶漬飯，不過如果你對日本嘅傳統茶漬飯有要求，咁我個人就不建議加錢試，因為呢個好麻麻，同埋其實個釜飯嘅飯好好味，** 軟熟得黎好煙靱 **，變左茶漬飯有啲嘥...如果再去，我會兩個人叫一個飯，因為飯嘅份量實在太多，叫一個飯之後，其實可以叫多幾款小食。超厚鰻魚真係唔錯，價錢都唔算貴，$118@。 牛肉其實呢個價錢都OK㗎，$58@。蕨餅就一般，口感略覺得未得。（其實賣日本飯圈外賣嗰間「乜乜結」個蕨餅其實好OK，價錢廿令蚊，味道口感good，有興趣可考慮吓。）Overall，都OK嘅～ 服務都正常。食左1個鐘左右到8點半，外面仲繼續有人排隊。