茂一茂 (已結業)

南豐紗廠都開左一段日子，又喺附近返工，食過嘅都係茂一茂隔離間大光燈多，係近日見到佢係夜晚7:30後做買一送一，又咁啱加班到咁上下時間，就拖埋我女人黎食糖水sweet 下，店舖設計係舊式冰室風格座位有啲窄，不過鋪頭唔大，香港地寸金尺土算係咁，餐牌選擇唔算多，但貴精不貴多，專注好出品仲好，咁先贏到口碑嘛！價錢其實唔算貴同外邊其他糖水舖差唔多，但比其他糖水舖好嘅係可能地段同時間關係冇咁多人的逼😬我就簡簡單單叫咗個傳統嘅香滑芝麻糊，店員服務唔差都主動，上菜速度幾分鐘都有，講返芝麻糊先，份量係一個飯碗咁大，都剛好載滿童叟無欺，質地濃稠度合格唔水汪汪，無一舊舊，反而味道我幾喜歡，清甜唔苦，杰身滑口，係略嫌黑芝麻味唔夠重，但以$27價錢我覺得都算係咁。