星海．譽宴 (The ONE)

營業中

休息中

約咗兩個好耐冇見嘅朋友，想搵一個舒適同傾到計嘅地方午餐，朋友就帶我哋去The One 18樓飲茶。一上到去，接待員就好殷勤招呼我哋，酒樓嘅裝修豪華，樓底夠高，而且枱與枱之間有足夠嘅距離， 所以不會有侷促嘅感覺，而且外望270度維港美景，我以為自己去咗ICC飲茶。一坐低服務員就攞咗一大盆熱水俾我哋清洗碗碟，喺疫情底下真係值得一讚。紅燒脆皮乳鴿隻乳鴿都幾大隻，而且外皮香脆，肉質嫩滑又juicy。豉油王腸粉不單單只係腸粉外層，而係每一層粉皮都沾上豉油王，香而不會太鹹，點上甜醬同花生醬，味道一流。金沙南瓜條外層酥脆嘅鹹蛋黃，內裏清甜嘅南瓜條，雖然我減緊肥，但都忍唔住食咗好多件。黑松露蝦餃王蝦餃外皮夠薄，D蝦夠彈牙同入味，在混入黑松露，味道匹配，呢個必食。珍菌雞湯浸翡翠苗裏面有兩種不同嘅珍菌，再加上新鮮嘅翡翠苗，食完金沙南瓜，再食呢個就感覺冇咁罪惡感。鮮蝦腐皮卷多層鬆脆嘅腐皮，包住彈牙新鮮嘅蝦膠，再點少少喼汁一齊食，好味。20年陳皮紅豆沙紅豆沙份量好多，而且紅豆起晒沙。大蟠桃麵包皮夠鬆軟，內裏填滿白蓮蓉同包住一整個鹹蛋。雖然已經好飽，但係都忍唔住要食埋佢。