台灣ET鹽水雞 (已結業)

相信好多去過台灣既人都有食過鹽水雞﹐真係又平又抵食，仲要好好味！！ 可惜香港雖然有好多台灣餐廳，但係鹽水雞就好少見，有時癮起想食都唔係咁易~ 經過見到呢間台灣ET鹽水雞咁特別，當然要試下同台灣有咩分別😄一人餐($46) 可加$10加配飯/麵一人餐可以揀雞胸/雞脾/三隻翅+三款自選配菜，我地選擇左雞脾+甜不辣、蜂巢豆腐同雞腎。 付款後店員會俾一個牌你，餐點整好後就會響提示你取餐，一打開個盒隻色係紅色的，食落醬料亦似韓式辣醬，有別於係台灣食過既味道。 可幸係雞脾滑溜，而且已經拆左骨成一塊塊，非常容易進食，三款配菜以甜不辣最出色，軟糯軟糯有d似年糕，係我鍾意既質感，蜂巢豆腐同雞腎表現正常，雞腎爽脆唔會梅。整體味道同係台灣食既有分別，可能係為左香港人既口味而作出改變，好唔好食就要睇個人岩唔岩口味，自己就覺得可以接受。份量係無加配飯麵情況下都有一大盒，量好足夠，亦適合作下午茶或小食食。