新聚會 (已結業)

唔係同事介紹，都唔會咁容易搵到呢度。其實這裡係一班新鴻基證券的舊部創立的聚腳點，淨係睇個大房入面大大張馮景禧先生的畫像就知。但就不用真的是新證舊生至可以訂位，但因為價錢唔貴又幾好坐，所以幾受歡迎，好多時即日訂都會訂唔到。今日四個人幫襯，地方是樓上會所格局，以深色為主，幾有格調，傾計食飯都唔錯。午餐有湯、小菜及甜品。今日湯是節瓜鱆魚豬骨湯，老火湯無味精，睇睇撈起的湯渣就知真材實料，幾掂；小菜有四款選擇，叫了蒸烏頭、吊片馬蹄蒸肉餅、糖醋骨同炒小棠菜，菜式屬家常小菜，不太油，有水準。其中以糖醋骨最好味，蒸肉餅都好送飯，蒸烏頭就仍有泥味，怕腥的未必鍾意。碟頭不少，幾位男士都算夠食；甜品是木瓜雪耳，不太甜幾清潤。侍應服務唔錯，招呼好亦好好傾，據講晚報時間仲可以安排雀局，幾唔錯的。訂位時可叫他們先把是日餐單傳真來看看，聽講情況許可下，事先點定菜都無問題。一湯一菜一甜品連白飯，埋單每位55蚊，幾好坐，算係唔貴。