小魚兒 (寶漢大廈) (已結業)

好似好耐冇食過烤魚，之前喺尖沙咀食過呢間都幾正宗，所以今晚過嚟銅鑼灣都見到有分店就唔使諗啦，直接揀佢。上到嚟佢呢邊個場大過尖沙咀好多，基本上全部都係卡位，坐得舒服好多。飲品方面，佢都有啲特別唔常見嘅飲品，我哋揀咗冬瓜茶同埋甘蔗馬蹄。如果通常你飲一罐唔夠喉想任飲嘅話呢度都係加$34就可以無限添飲，俾啲要飲好多嘢嘅人嚟講呢個價錢超級抵㗎。講返主題先條魚，佢呢度嘅口味大約有八種左右，每一種都好似會有唔同嘅配菜。我哋今晚揀嘅係酸菜味。配菜方面，佢又好滑嘅豆腐，呢個豆腐煲耐咗啲汁都好惹味。佢呢度嘅酸菜同其他地方用嗰啲好似有啲唔同，呢度呢個真係偏酸啲唔會得個死咸，但係都係一樣會越食越濃味，臨尾攞嚟淥下菜打吓邊爐真係一流。我哋今晚揀咗江團，貪佢啖啖肉，肉質夠嫩滑，最重要係冇乜骨。食到咁上下再錄埋啲薯仔同埋萵筍落去吸下個酸菜湯味，超滿足結尾。