安南 (又一城) (已結業)

其實大家平時去食開下午茶，都會發現好多酒店嘅下午茶係唔飽肚。因為份量少，而且嗰種飽肚係食糕點食到滯/膩。但今次要介紹呢一間下午茶係真正嘅飽肚，而且平又高質。又一城安南餐廳嘅三層下午茶，計番每一個人都只唔使$150。仲要每個人已經包左半隻炭燒大頭蝦、一碗自選越式湯粉。三層架入邊鹹甜點各佔一半。蝦多士舊蝦膠超厚，炸到非常鬆脆而且唔油膩。軟殼蟹咪紙卷真係有大大軟殻蟹，配搭埋生菜同埋米粉，口感十足，而且食落清新。蒜蓉牛油雞翼，炸完之後都非常入味，而且雞肉保持濕潤唔會乾身。甜品嗰方面最欣賞芒果紫米同埋斑斕椰汁糕，入口煙un軟糯。蟹仔肉鮮茄湯檬粉，湯底真係好番茄，而且蟹肉鮮甜，將整體湯底鮮甜味道提升。碗入邊都有三大片生牛肉，而且好多香菜，所以飲起嚟湯底特別清甜。大頭蝦佢冇乜加特別嘅調味料，食嘅係大頭蝦本身嘅味道，你見到佢個蝦頭爆曬膏，特別惹味。不過因為佢嘅三層下午茶一定只可以雙數咁樣叫，但係我哋三人行，所以我哋就叫多咗一份午市套餐嚟分享，不過都仲有八折，仲算抵食。咖喱滿佈椰香，而且配襯埋法包真係一滴不留。由三點入座，坐左個幾兩個鐘，環境舒適、服務尚可，價錢又公道，值得推薦。