程班長台灣美食 (已結業)

平時黎程班長都要排長龍，今次平日黎食好彩唔洗排隊。係熱情既店員招呼安排下就可坐低，然後先攞一個餐牌同紅筆，寫自己想點既菜，跟住去排隊俾錢就可以等食啦！今次叫左紅燒半筋半肉麵（$55）、肉燥乾拌麵（$38）、炸花枝丸（$32）、小食綜合盤（$28）、牛肉捲餅（$35）、蚵仔煎（$36）。太耐冇食台灣味，食到蚵仔煎同煎米血糕既時候真係好感動！先講小食，炸花枝丸、小食綜合盤同蚵仔煎都要等比較耐，因為都係新鮮炸起，真係會食唔停，米血糕同甜醬油好配，而蚵仔煎既甜甜醬汁軟綿綿、滑口嘅感覺正正就係好多台灣食物既口感，強烈推介！主食方面，佢嘅紅燒牛肉麵係有少少辣但好惹味，佢既牛筋炆到好軟好淋，麵底煮到岩岩好，唔會太糊或者太硬，呢碗牛肉麵只需要$55，性價比極高！必食！相比之下乾拌麵就較為普通。最後壓軸要講個人最期待既牛肉捲餅，同蛋餅既軟外皮唔同，呢個捲餅外皮係酥脆既皮，而餡料係好足料嘅大塊牛肉同青瓜，味道唔差但入口其實有啲乾，下次試玉米起司蛋捲餅應該會濕潤啲。聽講程班長今年三月就會暫停營業，鍾意記得嚟支持下佢哋，如果鍾意食佢哋嘅牛肉麵仲有冷凍真空包可以買返屋企！