鹿鳴居 (已結業)

Item: 鹿鳴居
Rating: 2
Author: 奧志雷

Deers Restaurant

此店已改名為新鹿鳴居

16 食評

味道

環境

服務

衛生

抵食

大埔

$51-100

潮州菜火鍋粥品大牌檔

奧志雷

等級4

2.1K

蒜蓉粉絲蒸鮮魷，腦裡突然有吊桶飄過，好想食啊 ﹗不幸地無吊桶賣呢，唯有退而求其次，鮮魷都唔放過。又會勁爽脆既？彈中又帶點嚥韌，每口都釋海出魷魚甜味與鮮味，夾上金銀蒜粉絲更加香口、更加可口 ﹗

西蘭花炒斑球，老闆娘稱無斑球，只有斑腩，但外賣黎既時候係斑球囉，打算比個驚喜我？但是乾鞋硬有齊，中左三寶呢 ﹗新鮮度強差人意，早之食斑腩好過啦。幸好西蘭花爽脆又多汁，甜味出眾，挽回不少分數。

椒絲乳腐油麥菜，我印象中多年來只食過油麥菜數次，突然腦海中閃過吊桶後，依家又閃出油麥菜囉，即刻叫黎食先。椒絲乳腐生菜、通菜都食過，創新用油麥菜啦。原來都好好味，味道都好夾。爽爽多汁油麥菜沾上乳香惹味又帶咸辣既腐乳醬非常醒胃，開心晒。

紙包骨，撕下油淋淋的紙袋原來係豬扒黎喎，其實我想要紙包雞扒，諗錯隔離添。紙袋索晒所有油，多油到滴出黎，加上唔熱就更加油啦。豬扒好瘦，因為用粟粉醃過，所以紙袋跟豬扒肉黏到實一實呢，如膠似漆根本分唔好，唯有咬走少少肉掉左去啦。

味道陰沉無生氣，單調乏味，表面勁油但質地硬掘掘，水準以下。想食肉又無咩 idea，問問老闆娘有什麼高見啦，紙包骨？好好好，試試。童年回憶是也，隱約記得小時候跟爸媽在酒樓嘆過紙包骨呢，有豬有雞又有牛的，次次不同。

剁椒魚頭，原來只不過係用鯇魚頭，都唔係啖啖肉大魚頭囉 ﹗細細隻骨杉杉無肉食，真係損陣味道架乍。求其鋪埋辣椒碎係面蒸熟出貨，簡單到不得了。微辣普通，無特別。小雲指定菜色，無問題，想食咩就 order 啦。深夜食堂，深夜的晚飯，已經十一點半喇，剛操完拳又唔想買外賣返屋企食自己，唯有落 baby 同幾個老友撐檯腳啦 ﹗都係鹿嗚居，好重皮費喎 ﹗經常幫襯都係貪佢質數夠穩定又經濟又肯送外賣之麻，不過今餐等 40 分鐘有多，仲要漏左個白飯添 ﹗

椒鹽蝦，蝦殼炸得透徹脆卜卜，兜埋椒鹽惹味香口非常，可以連殼都食埋，一點都唔浪費。游水海蝦味道甜美，肉質鮮嫩彈牙，美味極致。炸豬大腸，外皮炸乾爽鬆脆，不油不膩，程深橙色呢。不過只有皮，沒有肉，我最愛食裡面既絨毛體架，無晒既？味道偏咸重口味，我麻麻地喜歡，淋上大量甜酸汁就易入口好多。

蠔油炒韮菜花，去頭去尾，只得中間一段，莫非個頭太大？仲切得幾短下喎，怪怪的。味道都算清甜爽口，無渣不粗糙。記得第一次食韮菜花係廿幾年前係大埔陳漢記，完全食唔到，味道跟韮菜一樣勁嗅既 ﹗之後都無再食，幸運地早年去避風塘再試，鮮甜爽口無比，依家愛到不得了，非常喜歡食韮菜花，而且仲非常有益身體的。

大馬站煲，睇個菜名完全唔知咩黎，有豆腐、有燒肉、有時菜、等等，即係豆腐火腩煲？嘩，咸油兼備喎，撈上大量白飯中和後都食得津津有味，但淨食真係咸到吃不消啊。深夜十二點半的晚飯，餓了就要食飯了。

辣酒煮花螺，甚少會 order，因為大眾都較為喜愛原汁原汁食白灼，只係覺得一點悶，想來一點刺激。花螺肉已經浸得軟腍入味，味帶微辣不太嗆，醒腦醒神都不錯，只不過酒味欠棒，未見突出。椒鹽鴨舌，又叫另類食物，真係難得一試。炸得通透香口卜卜脆，炸漿勁脆包著嚥韌舌肉，配上喼汁酸酸甜甜好食好多。

馬拉盞炒通菜，雖然有點油，但香香辣辣惹味開胃，通菜夠新鮮又爽又甜又多汁，鑊氣十足，好好味 ﹗辣酒煮東風螺，厭花螺太細粒，專登要求要大粒東風螺，但似乎無咩分別 ﹗味道雖無花螺般鮮甜，但一樣好味道。肉質腍滑滲出香辣味道，微辣刺激，只是酒香微弱，幸好依然食得津津有味。

果皮蒸泥鯭，貪佢啖啖肉又無細骨，雖然有些食家厭棄泥鯭不揀飲擇食，連垃圾都食，但我一於少理，最緊要好味道。果皮去掉魚天生既泥味異味，散發著果皮清香，魚肉結實多汁，魚味非常濃郁，魚肚滑滑帶甘苦味道，搭上果皮豉油，特別有趣可口。

豉椒雞柳炒河走芽菜，我食豉椒炒河炒麵或飯都好，只想撈汁架乍，青椒洋蔥完全唔會食。炒河一舊舊無炒散喎，鑊氣還算合格。味道偏甜而濁，雞柳無味，救命。

生炒牛肉飯，鑊氣迫人、蛋香撲鼻，還飄著陣陣牛肉氣味，入口嚥韌彈滑共冶一爐，飯粒又乾爽飽滿肥嘟嘟，鹿鳴居炒飯果真無得頂呀 ﹗揚州炒飯、咸魚雞粒炒飯、福建炒飯、蝦醬炒飯、等等，全部都 5 星級無甩拖架 ﹗

酥炸美國桶蠔，炸漿脆卜卜略硬，幸好都鬆化，金黃不油膩，淨食或沾茄汁同樣美味 ﹗炸得香噴噴，咬開脆漿白煙緩緩升起，蠔味強烈而誘人。肉質實淨但裡面滑溜 juicy 又多汁，好味道有質數。

豉油皇炒麵，生抽、老抽混成黃金比例，配合得天依無縫 ﹗即炒夠鑊氣無得頂啦，唔會放到濕淋淋，炒得均勻又甜美脫俗、清香宜人，麵質乾爽嚥韌彈彈，香氣十足。好食到要不停吸啜，食到一條不漏、完全消滅方能罷休呢 ﹗近期大熱，人氣急升，比我地成班食到 hit 晒啦，大家都好喜歡 ﹗ ﹗因為同班朋友仔一齊食，所以費事走韮王喇，其他人都要食架麻，寧願自己慢慢揀出黎囉。無辦法我真係受唔到韮王陣草青味啊，近年已經食到芽菜同韮菜花架喇。

粟米魚肚羮，師傅失手了，質地特別稀，水汪汪又淡荗荗，莫非估到我會用黎撈炒麵食？香濃豉油皇炒麵撈埋淡口粟米魚肚羮既味道又剛剛好噃，咸香中帶著粟米甜味，掛著湯汁連粟米粒及魚肚碎，好好味呢。

魚香茄子，專登叫黎撈炒麵食架 ﹗鹿明居煮茄子真係有一手，到依家為止每道茄子菜色都讚不絕口。秒殺魚香茄子，好味到暈到一陣陣 ﹗淨食又得，撈飯不得了，添飯添到停唔到手。撈麵撈河撈伊又得，就連夾麵包都一樣好味道，百搭神菜呀 ﹗頂級煮茄子廚藝，棉棉腍腍滑滑，沾滿肉鬆咸魚辣汁，非常惹味濃郁香甜可口。

肉片炒韮菜花，本來想試蜆肉炒，但居然無蜆肉供應。韮菜花好老喎，不過未至於有渣既，雖然爽口但質感有點粗糙呢。加肉片炒味道唔錯，合格幾好食。

豉汁蒸游水筍殼，好耐無食魚喇，掛死人咩 ﹗好想食蒸魚，貴一貴都要食，百幾蚊條架，真係好很貴 ﹗啖啖肉的海魚啊，肉汁注滿每絲纖維間，立立令非常耀眼呢。魚味濃厚甜甜的，掛上可口豉汁魚汁更加開胃，有碗白飯撈下就真係企唔穩喇。

炸乳鴿，除了茄子、東風螺、灼海蝦、蒸魚外，乳鴿都係其一的招牌菜，但敝在水準參差、時好時壞，間中會過咸呢。啖啖肉亦炸得香噴噴，如果可以做到不油不膩加埋脆皮就更加好喇 ﹗

梅子蒸排骨，食到悶想試新菜，第一次叫，想試好耐架喇，但同我想像中差好遠。酸酸甜甜幾開胃又易受落，骨多肉少又斬得太過的骰，輪骨都輪到睏。質地偏乾硬，軟棉香甜強差人意，梅子排骨汁撈飯就好好食喇，可口非常，正啊 ﹗

菜芯炒牛肉，簡單就是美，返樸歸真。乸牛肉勁腍又滑嘟嘟，還可以啦。菜芯鮮爽香甜又多汁，無渣不老不粗糙，鑊氣澎湃好滿意。子蘿雞柳，無味雪藏雞柳滑溜溜，全靠個咕嚕汁同子薑味道，酸酸甜甜帶點薑辣，醒胃之選。

西蘭花炒鮮魷，西蘭花爽甜無比，天然菜甜味，大愛。鮮魷彈彈又嚥韌，部份仲超級爽甜添，好食無投訴。菜膽雞半隻，肥騰騰雪藏雞沒半點味道，雞皮勁厚又收埋大量肥膏，食到成口油。雞肉既鞋且乾。雞湯芡杰撻撻，味道濃而濁，試一次便夠。不過芥菜膽異常甘甜好好味，每一口都充滿菜汁菜甜味，非常可口呢。

西檸牛仔骨，第一次叫咁既配搭，估唔到好食過西檸雞喎。走油牛仔骨肉質滑溜棉棉，外層微脆香口，裡面 juicy 多汁，沾上微酸西檸汁夠晒提神醒腦，滿意。四季豆炒鮮魷，是但諗個菜，估唔到又唔差喎。撞得有趣，要大大注地塞入口，四季豆爽甜又充滿水份，跟滑彈鮮魷在嘴地打滾，美味。

豉汁蒸倉魚，鹿鳴居游水魚最少都成舊幾水一條架 ﹗不過又真係有料到既，蒸得不過火又剛剛好，魚肉又嫩又滑又多汁，魚皮魚鰭夠膠滑，沾上豉汁更是如虎添翼、美味無窮。養魚都可以烹調得如此出色，果真化腐杇為神奇呢，當然不能跟野生相題並論啦。

咸肉炒韮菜花，百搭韮菜花配什麼肉都非常可口，韮菜花爽甜多汁，趙到索索聲，又對身體十分有益，好好味呢 ﹗夾著咸肉一齊食，甘香濃郁帶油潤，甜加咸撞得精彩無得彈。

牛柳絲炒韮菜花，極品韮菜花不容疑置美味無比，配上雞牛豬、海鮮都一樣好好味。牛柳絲牛味濃，嚥韌有咬口，醃味香甜，滿意。粉絲海蝦煲，大大隻海蝦好甜啊，雖然蝦肉無白灼那麼爽彈，不過不乏蝦汁，沒有烚過火，剛剛好。蝦頭塞得蝦膏滿滿，不要怕醜，大大力吸啜，甘香無比。粉絲碎濕濕，用筷子夾都有點困難，帶著濃濃海蝦味道，索盡汁、蝦的精華，彷似飲緊蝦湯一樣。朋友仔好想食，雖然我最初有點猶豫，但無所謂啦，試試無妨。

菜芯炒斑球，最鍾意食斑球，堅係實淨啖啖肉架。沾少少粟粉走走油，特別香口，又可以鎖住魚汁在內，咬開肉汁微滲。不幸地質地比較鞋，而且落味咸左少少，淨食感覺過咸，送飯就剛剛好喇。大大碌菜芯充滿水份，一咬爆汁，清爽的菜甜味，沒有草青味，有鑊氣，大愛。

薑蔥魚腩煲，熱辣辣又香噴噴的薑蔥香氣，聞到已經流晒口水喇 ﹗薑蔥爆得好香口，氣味已滲進魚肉之中。魚腩炸得乾爽透徹，使到能夠掛上更多薑蔥汁，更濕潤美味。魚肉外層金黃微脆，肉地結實富咬口，魚味濃濃，滿意。