豐鍋雞煲 (京瑞廣場1期)

營業中

休息中

作為一個稱職嘅「雞煲愛好者」真係就算咩嘅情況都阻止唔到食雞煲嘅心。就響呢個好熱好熱嘅夏日熱辣辣中午時份，我去咗呢間好多「沙田友」都試過嘅「豐鍋雞煲住家小廚」。餐廳位於石門站隔離嘅京瑞商場，出閘之後轉眼就到，都幾方便架。午市時間，見到餐廳都有唔少捧場客，我哋坐好之後就叫咗個「豐鍋招牌麻辣雞煲」先，半隻雞、BB辣嘅辣度。然後再嗌其他配料，點知餐廳都好快手，稍為等一等之後，雞煲已經準備上枱喇！惹味呢兩個字已經唔夠形容佢嘅味道，難得嘅係半隻雞嚟講都唔算細隻。雞肉滑溜之餘、醬汁亦調味得恰到好處，唔知遮住咗雞嘅肉味。講番啲配料，一定要揀牛肉先，「頂級雪花肥牛」，要個大份嘅先夠盡興。上到枱面賣相唔錯，食落都好嫩滑。「特級牛柳粒」都叫咗一份，賣相唔會輸俾頭先果碟肥牛，食落嚼頭十足，肉味香濃。食雞煲唔可以漏咗豬皮，因為我最鍾意嘅食法係趁佢啲醬汁仲好濃嘅時候，千祈唔好加湯，要加啲豬皮去吸收鍋入面嘅精華。炸枝竹都可以有類似嘅效果，最後加湯，食埋唐生菜就圓滿嘞。