Bove (已結業)

近年四圍都有哂各式各樣嘅雞蛋仔鋪，款式五花八門，但係咪間間都好食我就有啲保留。今次試嘅係bove 位於元朗嘅分店，鋪頭位置喺俗稱元朗食街嘅又新街隔離。所以週未時間去買都會見到門口有條短短嘅人龍。鋪頭有雞蛋仔、夾餅、梳乎厘等等嘅甜品。每種小食又再有唔同嘅味道去揀，第一眼落都覺得幾花多眼亂。咁今次就試咗一個平平地$18嘅班蘭味雞蛋仔。估唔到都幾有驚喜，由於底雞蛋仔喺整完之後，店員會搵風扇吹一陣，令到雞蛋仔嘅表面非常脆，而入面係做到實心又鬆軟。唔似有時喺街邊食到嘅空心雞蛋仔，似食雞蛋餅多過雞蛋仔。配合埋淡淡嘅班蘭香，為正宗嘅外脆內軟雞蛋仔加上創新嘅味道。不過等候都要啲時間，通常要等10分鐘左右，而且職員嘅態度都唔算好友善。