九記打冷.小菜.粉麵 (已結業)

好鍾意同朋友去啲潮州小店打冷傾吓計，鍾意潮州嘢又有特色又好食。今晚我同相識咗好多年嘅中學同學去咗一間位於尖沙咀嘅潮州小店食嘢，那裏雖然環境唔係大酒樓嘅格局，而係典型地道茶餐廳嘅設計，但係別有一番風味。到潮州小店當然要點啲潮州地道食品。未食正餐前僅有一碟我最鍾意食嘅鹹酸菜做前菜，鹹酸菜酸酸甜甜非常醒胃。前菜除咗鹹酸菜，仲有鹹香味極濃嘅菜脯粒粒。蘿蔔豬紅： 好入味，豬紅實淨得嚟又幾滑，蘿蔔就煮得好淋而且無渣。除咗蘿蔔豬紅，原來仲有爽口嘅豬皮添。鵝件：件件整齊排列，鵝件色澤油潤，啖啖肉之餘更沒有一點肥膏，下墊有滷水豆腐和花生，餸啤酒或白粥都好啱。沙爹牛肉芥蘭：牛肉又嫰又淋，份量不少。沙爹醬汁豐富，味濃郁兼惹味。芥蘭翠綠又爽口。方魚肉碎粥大大碗，兩個人都食吾晒，湯底清甜可口。冇諗過每碟食品包括前菜都大件夾抵食，最終都食吾晒要打包返屋企，而且店舖位置又非常方便，下次再想食潮洲嘢都會再嚟幫襯。