炊豕店 (加路連山道) (已結業)

由於小妹返工返港島區，所以放工不時都會去銅鑼灣食好西，特別係加路連山道，稱得上係美食集中地👍🏻上星期同友人去咗炊豕店，平時成日都見排長龍，好彩今次早去，等咗５分鐘就入得。舖頭比較細，坐到20個人左右，座位有啲迫，裝飾幾有台灣復古感覺。一早聽聞呢度豬扒又大份又多汁，我哋兩個人分別點咗招牌蔥油豬扒飯（加配煎蛋同午餐肉）、大阪燒豬扒撈幼麵、肉燥凍豆腐，同埋一支橙汁。嘢食好快到，一上枱被佢個巨量size嚇親！蔥油豬扒好惹味，外脆內軟，塊午餐肉仲要係炸，勁邪惡但忍唔住一啖接一啖咁食。大阪燒豬扒都好好食，同平時日本餐廳食個味無咩分別，豬扒有成五六塊。幼麵幾煙韌，份量多到我打包做第二日飯盒。肉燥凍豆腐可以解濟，不錯不錯。埋單每人$90都唔使，飽到上心口。其實menu上仲有好多嘢都想食，下次放工再嚟過。