巴別橋地道燒烤

營業中

休息中

同友人喺銅鑼灣睇完戲，就步行到大坑覓食，雖然是日周末，但係大坑都唔算好旺，多數都係酒吧多人去飲野傾計；兩支公又唔係好餓，就扑鎚食串燒喇！呢間日式燒烤店面積細細哋，感覺休閒無拘束，可以邊睇電視，串串下，吹吹水都唔錯！最後點左烏冬、木魚燒茄子、雞軟骨、牛舌、白鱔、秘製汁燒廣島蠔、三文魚頭、大啡菇、魷魚筒釀糯米、同燒菜心，雖然話就話唔太餓，但一點就失控。上菜速度都幾快，先嚟就係烏冬：似巑岐烏冬咁滑嘟嘟，但個湯底明顯就係公仔麵味精包...呢個木魚燒茄子，普通喇，麻麻地，賣相滿佈木魚幾吸引，但茄子係脆身生生哋，唔係新鮮嗰種。雞軟骨同牛舌就大讚喇！！！燒到啱啱好，雞軟骨夠香口，牛舌嫩滑、肉汁香濃，表面燒到焦香，配上日式燒汁好惹味！呢個魷魚釀糯米，都值得一推，魷魚厚身好彈牙，再糯米有濃濃的味增醬酒香，飯帶濕潤口感，加埋塗上蜜糖，灑上海苔粉，好好食！秘製廣島蠔，友人歎開貴價野，話無咩特別，我就欣賞佢嘅蒜蓉汁，辣辣地咁幾刺激！是次埋單每人約二百幾，環境舒適，可以慢慢食又唔洗驚俾人催交枱，加上店員服務細心，會自動自覺幫你換碟，都算唔錯喇！！！