台蔡滷肉飯

營業中

休息中

我果日黎食，都排咗半個鐘先有得食，坐底咗，就可以用手機點餐，好方便。嘢食都上得算快，我地一行二人嗌咗鹽酥雞、紅燒牛肉麵、麻油雞套餐（包肉燥飯同小菜）紅燒牛肉麵湯底幾特別，牛肉冧，麵夠煙靭。麻油雞個湯底係藥材味重果隻，去果日啱啱涼涼地，啱哂！不過我覺得唔係個個受得，而雞都OK，唔算話好滑，但就好味。我比較對個小菜有驚喜，類似一啲筍同麵筋嘅嘢？冇問，但好入味。至於個肉燥飯，我太飽，只係食咗兩啖，感覺雖然見到腩肉，但食落唔係好膩。最為期待嘅係鹽酥雞，我係為咗鹽酥雞黎！係香港，真係好難搵到好食嘅鹽酥雞，一係就勁咸，一係就唔脆，一係就勁乾。依間聽講好好食，果然明不虛傳！冇令我失望！佢嘅炸粉係有落過心機，唔知係咪加咗麵包糠，冇乜粉感，味道啱啱好，唔會過咸，本身上台覺得佢比較深色以為係炸濃咗，食落就唔覺，我見隔離枱都係咁，可能特色黎。整體而言，值得再試，不過唔洗排隊就更好！