鋿晶館

營業中

休息中

唔知你哋經過有冇留意，喺旺角彌敦道有間自家製品牌嘅地舖，每次經過都有一班街坊客幫襯，點心、小菜、燉湯應有盡有，而且來頭不少㗎！今次嘅目標就梗係呢度嘅手作點心，難得可以食到曾經係日本東京富麗華專為高官同明星服務嘅師傅即點即製嘅點心，梗係要叫返夠本！而且師傅仲曾經喺香港米芝蓮酒店同埋大型連鎖酒樓集團做主管，可以話食物有質素嘅保證。無蒜不歡嘅我叫咗🤍蒜香蝦春卷 ，感覺係將春卷升華咗一個層次，春卷皮炸得好脆，斜切法仲見到內涵啖啖蝦肉添。大大粒嘅🤍黑松露北菇燒賣皇都好正。而🤍蓮藕煎鯪魚餅原來係將鯪魚肉同蓮藕粒混和，食落香口又變得有咬感。除咗點心，仲有小菜🤍 薑蔥斑頭腩煲，熱滋滋上桌，班腩炸過但仍夠入味，送飯一流。好耐冇飲過住家靚湯，食完啲熱氣點心忍唔住叫咗🤍花膠螺頭燉赤肉湯 同🤍芎白芷天麻燉斑骨湯，零味精嘅燉湯有住家湯嘅感覺。足料而且價錢相宜。最後嘅甜品🤍大良薑汁雙皮奶，香滑不輸專門店。