REFLECT Restaurant & Bar

呢間酒吧餐廳主打墨西哥Fusion菜，最近加入多款新菜式，另外亦有二人套餐供應。整體裝潢設計獨特，設有室內同戶外座位，綠色樹木、20米巨形塗鴉等裝潢，帶異國風情，令人感覺休閒又寫意，適合約另一半嚟聚餐。Big Burrito真心大，用墨西哥卷包住雞肉、黑椒、雜豆、芝士、牛油果醬、莎莎醬同酸忌廉。卷皮軟身，雞肉一絲絲，唔嚡口，配搭多款經典配菜同醬汁，層次感豐富，見唔少人點。Fajitas同樣出色，係以炒嘅方式烹飪而成，有蔬菜、雞肉或牛肉可選擇，另搭配洋蔥甜椒，蔬菜新鮮，鮮甜。旁邊有熱玉米餅、牛油果醬、莎莎醬同酸忌廉，自己DIY，好玩又健康。Gnocchi出面比較少見，煙煙韌韌帶點咬口，估唔到咁細份都幾飽肚，黑松露醬汁夠掛身，淡淡香氣，搭配椎茸、白蘑菇同靈芝菇食都幾夾。另外有Pizza，烤至脆身，唔油膩，似係食緊薯片咁，脆卜卜好過癮，內層軟熟，雞肉大塊但唔嚡，啖啖肉，另有紅洋蔥、黑椒、黑橄欖同自家製燒烤醬，性價比高，值得一試。