稻香 (已結業)

冷風到，特別想打邊爐，今晚揀左黎稻香打，可以慢慢食，食火鍋放題太趕啦。六點幾黎到，係咪太早呢？得幾枱客咋，侍應安排左窗邊嘅二人枱，幾濶落，又有街景睇下，唔錯。湯底四十八起，料價錢分紅黃綠，四十八，三十八同廿八，另加十二蚊可以任飲酸梅湯，豆漿，夏枯草，果汁等，仲有紅豆沙，芝麻糊等糖水任食，都幾抵呀。點左幾樣料同芫荽皮蛋湯底，啲料超快到，賣相都幾靚。美國肥牛 $48卷到一圈圈咁，幾靚，但啲冰一滆左就塌哂落黎。半肥瘦，幾有牛味，ok啦。響鈴卷 $20我見有啲枱係十條，有啲係八條，大細之分？無油味，浸一浸就食得，啱哂心急人士。蟹柳 $38冰得黎無雪味，有少少鮮味，都幾好味，好啱打邊爐。潮州魚蛋 $38友人不喜，幾乎係我一個人食哂，無乜魚味，質感鬆散，有魚骨，麻麻。鵝腸 $48鮮嫩爽口無異味，好食。西洋菜 $28洗得好乾淨喎，賣相靚，打邊爐食西洋菜好正，吸湯一流。芫荽皮蛋湯底 $48芫荽唔多但皮蛋就幾多，略鹹左少少，都幾香架。除左落單全程都無伙計，基本上任坐唔趕客，傾計吹下水食下野都係一個好地方。