影片
更多
2024-09-23
680 瀏覽
竹面譜📍太子荔枝角道68號地舖星期五準時放工，我同朋友約好喺太子行街，算便食埋晚餐，誤打誤撞入咗一間當區好受歡迎嘅小餐館。從店名推敲，呢間餐廳應該有麵食，而且應該係港式餐點為主。睇睇餐牌，果然不出我所料，但驚喜嘅係，呢間餐廳原來係日本夢王蛋專用店，而且除咗例牌麵食、水餃雲吞外，佢哋仲推出和牛丼飯、雙蛋百搭飯、咖哩、鮑汁花膠鍋同自家鮮製涼茶等。店面雖小，但選擇眾多，不論愛飯麵定走低carb diet嘅客人，都總會搵到啱心水嘅餐點。今次因落雨而不經意發現嘅竹面譜將會係我哋每次嚟太子嘅首選餐廳。膚淺哋先講價錢，餐廳逆市中仍堅持以平到笑嘅價錢為太子街坊、當區學生同打工仔提供高質餐點，呢點已經好佛心，好唔話得。有幸同老闆娘傾偈，從言談間得知佢哋將唔同類別嘅食客飲食需要作為考量，再針對各類客人設計餐點，令所有人都可以自由揀選適合自己嘅嘢食，呢點更值得令人佩服。簡單而言，老闆娘考慮到學生們處於發育期，所以主動向佢哋提供加飯唔加錢服務，令學生哥可以用平價食飽飽；又喺11:00至5:30呢啲午市茶市黃金時間，推出蔥油孖蛋百搭飯，餐肉、豬扒、雞扒、雞翼主食四選一，連孖蛋都有得選擇烹調方式，都係兩張廿蚊有找
📍太子荔枝角道68號地舖
星期五準時放工，我同朋友約好喺太子行街，算便食埋晚餐，誤打誤撞入咗一間當區好受歡迎嘅小餐館。從店名推敲，呢間餐廳應該有麵食，而且應該係港式餐點為主。睇睇餐牌，果然不出我所料，但驚喜嘅係，呢間餐廳原來係日本夢王蛋專用店，而且除咗例牌麵食、水餃雲吞外，佢哋仲推出和牛丼飯、雙蛋百搭飯、咖哩、鮑汁花膠鍋同自家鮮製涼茶等。店面雖小，但選擇眾多，不論愛飯麵定走低carb diet嘅客人，都總會搵到啱心水嘅餐點。
今次因落雨而不經意發現嘅竹面譜將會係我哋每次嚟太子嘅首選餐廳。膚淺哋先講價錢，餐廳逆市中仍堅持以平到笑嘅價錢為太子街坊、當區學生同打工仔提供高質餐點，呢點已經好佛心，好唔話得。
有幸同老闆娘傾偈，從言談間得知佢哋將唔同類別嘅食客飲食需要作為考量，再針對各類客人設計餐點，令所有人都可以自由揀選適合自己嘅嘢食，呢點更值得令人佩服。簡單而言，老闆娘考慮到學生們處於發育期，所以主動向佢哋提供加飯唔加錢服務，令學生哥可以用平價食飽飽；又喺11:00至5:30呢啲午市茶市黃金時間，推出蔥油孖蛋百搭飯，餐肉、豬扒、雞扒、雞翼主食四選一，連孖蛋都有得選擇烹調方式，都係兩張廿蚊有找，造福附近嘅街坊街里！可能有一班鍾意做gym嘅客仔經常幫襯，老闆又為佢哋專門打造low-carb選項—低卡蒟蒻麵、慢煮雞胸等，令一眾gym友唔洗淨係食白灼嘢咁
最後，就係非常人性化嘅點餐設定，相信大家都可能遇過想追加小食、配菜，但優惠價錢只能加配一次，再追加就必須以正價追加嘅情況。深知食客心意嘅竹面譜，全日供應「無上限追加」選項，以超抵價錢共提供20款小食、飲品、配菜，如輕量版炸物、郊外油菜、香茅豬扒、香煎雞扒⋯⋯只要想食，就可以無限加加加，啱晒樣樣都想試下嘅朋友！
[價錢 Price]
💰$68
夢王和牛丼🐄
全場最多人嗌嘅一定係呢碗高打卡度嘅夢王和牛丼，朋友坐落就被佢吸引住。多數人都會揀配生夢王蛋方便撈飯，但朋友唔太喜歡全生雞蛋嘅口感，所以揀咗配流心蛋。小小一碗嘅和牛丼非常搶眼球，和牛肉色嫩紅，充滿油份，睇住橙紅色嘅流心夢王蛋黃慢慢溢出，加入少量醬油後拌勻蛋黃同珍珠米，每一口白飯都食到鹿兒島A5和牛嘅餘香！和牛接近入口即化，蛋黃包覆每粒米餸，貌似簡單嘅配搭卻打造最驚人嘅味道，牛魔王們一定一定要嚟食返次！
[價錢 Price]
💰$34
馳名韮菜餃 🥟
身為餃子控又點可以唔試下佢哋嘅韮菜餃？因為想食得健康啲，所以揀咗湯餃，有quota嘅朋友可以試下炸韮菜餃。雖然唔係我食過最好食嘅餃子，但佢的確可以用皮薄餡靚嚟形容。
將翠綠嘅韮菜混入半肥瘦豬肉，包喺薄身但細滑嘅餃子皮內，餡料調味適中，個人認為就咁食已經有好香嘅豬肉同韮菜香氣，加上中長嘅拖尾，入口非常順滑。最抵讚係無添加味精嘅湯底，清澈無油，飲多兩啖都唔怕大負擔！
[價錢 Price]
💰$48
低卡蒟蒻麵 🍜
Low-carb選項有冷食/湯食蒟蒻麵，兩款都有跟配一隻夢王蛋，抵食不二之選！我哋揀嘅冷食配有吞拿魚、車厘茄、粟米粒同青瓜絲，打完卡後拌入芝麻醬，就可以享受一碗冰涼低卡Q彈爽口嘅蒟蒻麵！
[價錢 Price]
💰$42
炸蜆蚧鯪魚球拼炸墨魚餅 🧆
淨食單拼雙拼統一$42，我哋揀咗招牌蜆蚧鯪魚球拼炸墨魚餅。鯪魚球偏長身，有少少似欖欖形狀，每粒大細相若，即叫即炸夠晒熱辣辣！咬一啖便知龍與鳳，雖然鯪魚球大大粒，但一啲都無偷功減料，食落口感皮脆肉彈，無加入大量粉去定形，反而以鯪魚撻成膠製成，彈牙嘅口感、新鮮嘅魚香味無得呃，一定係真材實料、自家製先有嘅質素。鯪魚球本身味道唔算重口味，非常建議大家點少少蜆蚧汁食，吊出鯪魚球嘅鹹鮮！
炸墨魚餅混入少量粟米，同樣唔會食到成口粉，厚薄適宜，炸得香口，點泰式甜辣醬一齊食更加惹味！
[價錢 Price]
💰$18
烤豬頸肉 🐖
老闆娘極力推薦我哋追加烤豬頸肉，解釋因為經過多番失敗後，先研究到以先蒸後烤技術烹調豬頸肉。而且厚薄必須拿捏得好，先可以令豬頸肉既腍身，但又保留到爽彈嘅口感，烤過後仲多咗份焦脆，點埋微酸嘅醬汁更能中和油膩，留下油香，推薦大家一試！
[價錢 Price]
💰$18
瑤柱上湯浸蘿蔔 🥕
蘿蔔清甜無渣，湯底簡單以薑、蔥、瑤柱煮成，純粹嘅味道、暖胃嘅感覺，令我覺得呢道小食勝過居酒屋幾十蚊兩片嘅高湯蘿蔔多多聲。
[價錢 Price]
💰$10
凍清心火 🌿
以麥冬、白芍、燈芯花、淡竹葉同羚羊絲煲成嘅清心火涼茶，有清熱氣、熱氣、除口氣、去暗瘡、平肝火、肺燥咳同安眠作用，主打新鮮自家製，而且有微糖同無糖供以選擇，加配價都只係$10一枝，絕物超所值！
除清心火外，仲有去濕茶同金銀菊花薏米兩款選擇，全部顏色都偏淺，但飲落好夠味，真材實料，凍飲份外冰涼降火！
[價錢 Price]
💰$28
炸鮮奶卷 🫔
最後追加輕量版炸鮮奶卷甜品作結，出乎意料之外，朋友最愛居然係好多地方都有得食嘅炸鮮奶卷。原因係呢度唔會炸得太乾身，又唔會滴晒油，真係食到奶嘅香醇，難怪老闆娘咁推介！
張貼
