好燒式串燒專門店 (砵蘭街)

營業中

休息中

早幾個星期試過深水埗的好燒式，覺得好好食，所以心思思想再試。上 Openrice 見到旺角有分店，所以就嚟試試。 旺角店的店長一貫地熱情地推介海鮮，終於明白箇中的因由，原來佢哋每天去街市買最靚的海鮮，所以今次嚟就無聖子皇食，話今天聖子皇唔靚，於是就食左蒜蓉燒扇貝及日式汁燒南非鮑魚。不過食落麻麻地，扇貝燒得太熟，鮑魚新鮮，燒得剛好熟，但醬汁似是熟後加上，沒有汁燒的效果。而且二者味道都一般。 牛油金菇包，落左好多牛油，熱辣辣食係幾好味。不過一定要趁熱食。燒日本甜心蕃薯，一般急凍食品燒熱嚟食，一般啦！墨魚丸，汁燒效果唔錯，ok 好味！韮菜、牛油粟米、雞軟骨、雞肉腸，全部都正常好味。燒日式芝士年糕，好正！大多數店都只會炸俾你食，好耐無見過燒的芝士年糕。鹽燒白鱔，材料新鮮，好好味。菠蘿，好甜，好多汁，作為餐後甜品一流！ 可能因為期望過高，今次食唔番之前在深水埗食到的好味。整體不能說唔好味，只是有比較，感覺上旺角店的調味好像是欠缺了一些甚麼，若有所失似的。