張煥記

營業中

休息中

今日試咗呢一間大埔熟食中心上面嘅茶餐廳，坐低問個夥計有乜嘢好食，佢竟然推介我食豬扒烏冬，心中一寒，我梗係冇聽佢話自己叫咗奶醬多同埋熱奶茶啦，因為我覺得呢兩樣嘢係最能夠代表茶餐廳嘅質素。佢杯奶茶係好飲嘅，奶味同埋茶味嘅份量都OK，唔會只有奶味冇茶味又或者相反，杯奶茶入口都夠細滑。奶醬多就有啲強差人意，一句講晒就係求求其其，多使用嘅麵包係普通方包我唔介意，但係烘得唔夠乾身唔夠脆就係多士嘅大忌，另外唔好睇小煉奶同埋花生醬，煉奶嘅份量唔可以太多，否則會整林晒件多士，另外煉奶都係偏甜，如果太多嘅話真係頂唔順，相反花生醬就要多啲，如果唔係咬落去嘅時候真係冇乜feel，尤其是係邊緣位置。呢一間嘅包唔得而且花生醬太少，所以係令人失望嘅。