滬上園 (已搬遷) 新店位置

午飯時間同阿爸來吃飯，叫咗一個嫩雞煨麵同一個紅燒豬軟骨菜飯餐，另外再叫個灼菜。午市跟餐可以加$12 配鮮肉雲吞或素菜雲吞，我地就揀咗一份素嘅。而豬軟骨飯就連一碗蛋花湯或者酸辣湯，我地揀咗蛋花湯。上菜速度都幾快，等幾分鐘就有得食。先飲個湯，裏面主要係紫菜同蛋絲，清清地唔咸，味道都ok嘅。跟住到嫩雞煨麵，大大碗，滿佈青菜同雞肉，湯底呈濃濃的奶白色，睇個樣已經覺得正! 食落雞肉鮮甜，麵條夠軟腍但唔會好“梅”，連足料煲出來的湯底一齊食，效果非常好 素菜雲吞就普普通通，入面有椰菜同紅蘿蔔，而唔係我想像中嘅菇類同白菜韭菜等嘅綠葉菜，下次可能叫個菜肉雲吞試下。至於紅燒豬軟骨菜飯都唔錯，有六大件豬軟骨，炆得夠腍，豬肉鮮香，醬汁唔鹹係好事，但連喜愛清淡嘅我都認為可能可以稍稍濃返少少，有番果種上海菜鹹鹹甜甜嘅特色，不過真係寧願淡啲都唔要過鹹! 個菜飯都幾好，高湯味加上菜香同少少油香，但唔會過膩，同平日多食嘅白飯係另一種滋味。 總括黎講食物質素相當唔錯，份量算慷慨，兩個人食到飽飽埋單先至$102，十分抵食! 呢度下次還會再來的。