上海婆婆336 (荃新天地) (已結業)

以前經常經過上海婆婆，都見長長人龍，好好奇佢點解咁旺場，但由於唔想呆等，所以一直無試上星期平安夜行完山，趁時間尚早，居然見到上海婆婆無人排隊，一於早些開餐慶祝平安夜。＊皮蛋豆腐：普通前菜，合乎水準。＊魚香茄子：新鮮熱辣，好濃味，正。＊上海婆婆粒粒炒飯：絕對值得推介，又係新鮮熱辣，炒飯配料包括蠟腸粒、叉燒粒、火腿粒，炒飯粒粒深咖啡色，好濃味，雖然有些少漏，但真係好惹味。＊黃金蝦仁：呢個小菜雖然幾貴（$98），同埋只得九粒蝦，但值得推介，每隻蝦都好大粒，用鹹蛋黃炸香，味道好濃，好在有青瓜伴碟，中和些少油膩感，不過真係食一粒起兩粒止已足夠，我合共食左五粒，飽滯感覺真係揮之不去！整體來講，菜式的味道偏於濃味，但整得唔錯，而且味味都係熱辣辣奉上，感覺唔錯。埋單合共二百三十蚊左右，唔算好便宜，但值得再去。