喇沙專門店 (已結業)

近來發現西九food court多左好多好野試。近呢幾次試嘅都有驚喜，而且味道非常好。不過當然啦，都會發現價錢會偏高，始終深水埗係平民區，出名食野平，但依家啲食物價錢都高左，未必人人都會選擇去食。呢間喇沙我想試好耐喇！開左都一大段時間但就一直冇機會去試。見多數人推介雞扒同牛舌喇沙。牛舌我只會鍾意煎同燒烤，如果係炆煮我真係唔好，所以揀左雞扒。雞扒最少有5小件，不過不失。有上海麵同米線揀，我揀左米線。因為我係外賣嘅關係，米線浸左陣，我覺得淋左啲，如果可以將湯同米線分開咁就perfect喇。原來仲有半隻雞蛋，雞蛋全熟，但我覺得冇乜所謂，因為呢碗喇沙嘅重點唔喺呢度，而係湯底。個湯我覺得好夠味！我好鍾意！啲豆卜索哂味！真係好正！$48送一盒紙包飲品，價錢略高少少，但勝在好味。