源發咖啡廳 (已結業)

趁小店結業之前，我同男朋友嚟咗光顧源發咖啡廳。當日人好多，要排10至15分鐘先可以入到去餐廳。源發咖啡廳嘅裝修好似返返去六七十年代咁樣，店內仍然保留當年嘅地磚，牆壁仲有老舊嘅水墨畫， 十分有懷舊風味。我哋點咗蔥油豬扒飯，紅豆冰，乾炒牛河，熱奶茶。蔥油豬扒飯嘅豬扒煎到好香蔥油同豉油同飯都好夾，非常美味。紅豆冰嘅紅豆去到杯嘅一半，非常抵飲。乾炒牛河略嫌唔夠鹹，但非常有鑊氣。熱奶茶茶味同奶味都好香濃。侍應話呢間餐廳嘅舖頭業主要收返，所以必須結業，都非常可惜。