嘉寶漢堡 (和益中心)

營業中

休息中

主打食burger嘅嘉寶漢堡，外賣就幫襯得多，今次終於可以坐低慢慢嘆。芝士牛堡（$48） - 呢個絕對係經典配搭，入面有牛肉、芝士、生菜同埋蕃茄，牛肉夠晒juicy，個包烘得好香，另外加配咗煎蛋一隻（$6），要讚吓佢嘅流心蛋，提升咗成個burger嘅味道。甜辣菠蘿脆雞堡（$42） - 雞塊炸得好香，入面同樣有生菜同蕃茄，個甜菠蘿真係係靈魂精髓，酸酸甜甜，配搭非常惹味。鍾意食炸雞嘅朋友一定要試下。點任何漢堡都可以加$18提升至套餐，套餐包裝小食及飲品。小食我哋點咗番薯條(+$5)及香脆粟米片雞塊（+$10）各一份，份量都好多，蕃薯同雞塊都炸得好香脆。如果嫌平時食得炸薯條多，番薯條都可以係一個幾好嘅選擇。飲品選擇都唔少，除咗汽水之外亦有茶飲、啤酒椰青水、檸茶檸水及柚子蜜等選擇。餐廳座位闊落，設計簡潔。好貼心咁設有洗手機，方便用餐後清潔雙手。