程班長台灣美食 (已結業)

要到荔枝角攪啲電子產品維修，做完都下午茶，上開飯網發現呢間台式餐廳，我唔知佢在台灣係唔係出名，最緊要好味！仲要好近維修中心，行過去都唔使5分鐘，工業大廈1樓，地方幾大，下午茶時候無乜人，店員都說國語，坐低比份點餐卡（過膠可以畫完再用，幾環保）再叫我去收銀落單，食物款式多，自己喜歡台灣麵湯底好濃香！落單後攞埋號碼牌回座位等食物，店員會送上，餐具要自取！牛肉乾拌麵（$45）：賣相靚，撈埋一齊食，麵質似刀削麵，不規則形狀，煙煙韌韌！好喜歡呢種質感，醬汁好濃，淨食會好咸，拌麵食就剛好，中間夾雜啲豆乾粒，牛腩好入味，肉質唔韌，肥瘦相間，仲要唔黏牙，中間夾啲爽口青瓜，增加口感又解膩（如果多啲就更好，鹵蛋入味但蛋黃太實，唔煮咁熟會好啲！紅豆芋圓（$28）：店員會留意住我食晒麵先上甜品（我無開口要求，好窩心）甜湯足料，芋圓有兩隻色，不過味道無大分別，煙煙韌韌，紅豆大粒，呢個甜湯，唔起沙，同廣東紅豆沙唔同！幾特！店員有禮，聲音好嬌嗲！地方裝修雖然平實，乾淨企理！可惜今日只有一個人，試唔到好多款式！