莆田 (美麗華廣場2期) (已結業)

經過美麗華又未食晏，見到有個海蠣主題餐牌立即心癢癢，而且未食過莆田一路都想試下，機會黎喇。✨標榜養足300日，所以會更加肥美。飼養環境嘅海水鹹度比一般既低，海蠣腥味會少d, 肉質都會更甜，望落好似好勁。✨居然有菊花茶，啱晒我呢d 熱底人清下毒，個茶包仲要超大。✨百秒黃花魚：平時唔係好食魚，但黃花魚係我會食既其中一種。個魚超嫩滑同新鮮，食到魚既原汁原味。連個魚汁都好正，薑味重得黎好鮮甜。✨江口家鄉海蠣湯：個湯既配搭好得意，有蕃茄，椰菜花，蛋花。飲落酸酸地得黎又有d 薑味同蠔香。海蠣好鮮嫩，一d 腥味都無。✨酥炒芋芯：外皮用糖炒過脆卜卜，裏面既芋頭好香，呢個真係超好食，如果芋頭可以腍身d 就更加正。✨褔建特式海蠣煎蛋：海蠣超多，個蛋煎出黎唔會乾，加埋d 蔥花都幾香，不過個質感食落係會漿住個口咁。✨興化炒米粉：未食過d 米粉係咁幼，食落感覺好鬆化好軟綿，而且好入味。入面d 紫菜脆脆地勁香，材料仲有蝦，花生，蜆，瑤柱。平時唔鍾意食米粉既我都覺得好好味，一定要試。