錦麗 (東薈城名店倉)

營業中

休息中

呢日約咗朋友喺東涌行outlet，但竟然冇買到嘢，有D挫敗感。咁就要搵D好嘢食來彌補缺失。逐層行來到七樓，見到錦麗，朋友話之前喺第二度食過呢間感覺唔錯，問我有冇興趣，有好嘢食我當然有興趣，唔會執輸啦。行左一排，好鬼攰，見到我心愛的椰青，啦啦聲嗌咗個，似係個好品種，飲落清甜新鮮解渴。再來個“特色小食拼盤 ”，包羅萬有，有好耐冇食過嘅越式庶蝦，又香口又juice嘅香茅豬扒，法式牛油雞翼和紫色的金絲網卷。“酥炸軟殼蟹撈檬”跟埋檸檬酸汁好鬼惹味，越食越好味，好快食晒，軟殼蟹大大隻，有肉地，炸得香口，食得滋味。“錦麗生熟牛肉粉 ”lunch 套餐，加D錢叫咗個玫瑰龍眼茶(熱)，養顏，養心，養胃，個粉朋友叫咗走蒽，走洋蔥，雖然如此，呢個牛肉粉依然幾好，湯頭好清甜，清清淡淡也不錯，牛肉亦是好味，鬆化。"酸芒斑蘭糯米卷"好有特色，第一次食，糯米煙煙靭靭，芒果並不太酸，又有斑蘭味，非常之好。