The Tomato Story (已結業)

打工仔又到放lunch嘅時間! 疫情關係日日都要買外賣, 今日想對自己好啲, 鎖定一間一直都好想幫襯嘅小店! 位於灣仔同金鐘中間, 太古廣場三期附近嘅一間小店, 出晒名專做蕃茄菜式, 價錢都唔算平嘅, 果然成個餐牌都係蕃茄~~~ 選擇左餐牌上面排第一嘅經典蕃茄牛肋肉湯通粉! 一打開分量咁少, 有啲嚇人 蕃茄汁用好多蕃茄蓉去做, 食得出好入味, 原汁原味嘅蕃茄~~~ 用心度抵讃!! 牛肋肉亦都幾入味, 可惜份量真係太少, 兩啖已經食完... 抵食度要扣分... 另外我加咗錢要咗杯熱奶茶, 一打開個杯蓋, 飲品個顏色深到好似鴛鴦咁, 當堂驚一驚, 飲咗一啖, 澀到我無辦法再飲落去, 極度懷疑佢落得好少奶.... 嚴重扣分...