Aroma Truffle (已結業)

Aroma Truffle 黑松露薯片之前成日都見人話好好食，今日係海港城CitySuper隔離，竟然發現喺尖沙咀海港城開咗新分店呀。Aroma Truffle 黑松露薯片有三隻口味，分別有原味，巴馬臣芝士味同蜜糖味。店員態度非常親切，三隻口味都可試哂先買。原味黑松露味非常香；再試蜜糖味，係一款淡淡甜味嘅黑松露薯片，味道都唔錯；跟住試埋巴馬臣芝士味，芝士味淡淡，唔會太強搶咗黑松露嘅味道。依一款我最中意，所以買咗依款返去。另外店員仲俾我試咗黑松露辣椒醬。辣椒醬辣味唔算勁，感覺有點似Tabasco。但加入咗黑松露，成個味道即刻升級咗。不過我比較少下廚，所以最終都無買到。諗諗吓都有啲後悔。搵日過去再買巴馬臣芝士味黑松露薯片，順便買埋依支黑松露辣椒醬先。