OPPA Coffee Bar Restaurant

營業中

休息中

金巴利街有好多間韓國菜，OPPA Coffee Bar Restaurant 嘅裝潢走清新韓風，一行入去就覺得好光猛好舒服。餐牌上有好多特別嘅菜色，因為今次同一班friend一齊食，所以都嗌咗幾多嘢食。秘製章魚蛋漿熔岩炒飯好特別。店員擺咗個飯係枱面之後就開始係側邊倒蛋漿，仲落咗好多芝士係上面，之後再用火槍燒到啲芝士溶晒。啲飯本身有少少辣，撈埋啲蛋同埋芝士，拉曬絲咁，又可以食到一粒粒嘅章魚，真係好正。另外我地仲嗌咗半隻蜜糖牛油無骨炸雞，份量都唔少。啲炸雞熱辣辣，外脆內嫩。炸雞下面仲有好多粗薯條，配埋甜甜地嘅蜜糖一齊食，真係好好食。韓式蒸餃子賣相好靚，一共有五粒，粒粒都有半個拳頭咁大，餡料又好多，好味得黎夠哂清淡。雞肉流心小丸子係可以DIY嘅菜式。店員會擺一部小丸子機係枱面，之後再俾雞肉飯、芝士同埋牛奶蛋漿。將啲芝士撈落啲雞肉飯到，再擺喺機上面整成圓球，之後再倒牛奶蛋漿落去，等佢慢慢成型，好食得黎又有得玩。三色韓國煎餅有泡菜煎餅、蔥煎餅同南瓜煎餅。每款有三個，賣相超級靚，食落煙煙韌韌，有好香嘅南瓜味，真係好正。