February

營業中

休息中

呢日嚟到觀塘食之前買落嘅團購二人餐。個餐包咗餐湯同沙律，一個主菜，一個意粉/飯，一人一杯啤酒/紅酒，仲有個餐後雪糕。沙律: 沙律葉唔算新鮮，紫椰菜太硬而且苦，dressing偏酸，但幾鍾意佢加咗鮮甜嘅芒果。餐湯: 本來望落以為係平淡無味嘅白湯，飲落有驚喜喎，竟然有黑松露味。龍蝦汁海鮮意大利飯:一上枱已經見到佢嗰隻幾大隻嘅大蝦，仲有兩隻青口，飯入面仲有啲鮑片粒。飯煮得比較腍，但依然係粒粒分明嘅。有龍蝦汁嘅味道但整體口味偏淡，味道單一。大蝦同青口都算新鮮。總括嚟講個飯嘅水準不過不失。德國火焰咸豬手: 重頭戲係呢個火焰豬手，侍應點火前會叮囑客人準備好相機。火熄咗仲會問客人想自己切開豬手定交俾廚房切。專業嘅果然切得好整齊。本來擔心搞咗一大輪豬手會唔會唔脆呢，點知個皮依然香脆。豬手唔肥唔瘦啱啱好，仲要啖啖肉，兩隻為食豬都食唔晒。 最啱配住啤酒食。