徐記廚房(點心) (已搬遷) 新店位置

見太子附近嘅點心鋪大部份都已經試過哂 今日就嚟埋這間試埋佢 🐒下晝五點半左右嚟到, 唔駛等位就入得 等食期間見佢不停都有新客入嚟同叫外賣 🚲相信質素應該都有返咁上下 🔻鮮蝦春卷 非常足料, 鮮蝦塞滿整條春卷 可惜 完·全·無·翻·熱, 上枱時係凍嘅 春卷皮有少少滲油, 不過都 keep 到大部份位置脆身 餡料調味唔錯, 唯獨有少少糊狀, 令食落嘅感覺唔好, 成日懷疑佢未熟... 整體味道同口感都合格 🔻蟹籽燒賣皇 新鮮蒸起, 但上枱時唔算好熱, 應該攤咗陣先拎出嚟 燒賣鮮味多汁, 食到有大粒蝦仁同瘦肉粒 肥豬肉打到好細, 融合咗餡料入面, 所以唔會見到有大粒肥肉 🐷 整體質素屬中上, 好食 兩個點心埋單 $60 💰如果只追求食物質素, 唔睇其他, 佢係可以嘅 點心好食, 而且選揀多, 蒸點, 炸點, 甜品, 湯品都有供應 但留意並唔係全部點心都寫哂係點心紙上面 咁嘅安排對第一次食嘅客人嚟講有少少混亂 另外, 鋪頭嘅食物衞生真係麻麻 可以見到燒賣籠裏黏住上手留低嘅包 而且服務比較求其, 上枱點心完全唔熱絕對係一大敗筆