三郎麵燒屋 (已結業)

朋友話明愛果邊開左間車仔麵好好食，有日得閒就同CHICKEN去左果邊試下，估唔到位置係咁邊邊，開係明愛山腳下。店面唔算大，間鋪望落好新，採用木具餐桌，睇落乾淨企理。點菜紙除左車仔麵之外，仲有其他小食同串燒，結合左港式日式既文化，不過本人覺得餸既選擇少左啲。學生餐勁抵食！可惜已經過左學生時期 另外仲有燒海鮮等，時價而定。揀左幼麵、湯底：腩汁，三款餸包括：魷魚、牛腩、蘿白。湯底清得黎夠入味，配埋牛腩食好夾，但牛筋同脂肪位比較多(兩樣都唔食)蘿白清甜，魷魚好食但份量太少，食得唔夠過癮，但整體上既味道，我會比4粒星，湯底最令我驚喜。CHICKEN揀左公仔麵、湯底：腩汁，三款餸包括：肥牛、豬頸肉。要提一提係，佢每碗車仔麵都會加蔥花同蝦米，客人可要求多啲／唔要。食完車仔麵未夠喉，再嗌多幾款串燒，分別係牛肉粒同花枝丸，花枝丸燒至黃金頗香口，味道唔錯。而牛肉粒既份量偏細，而且燒到好乾身，口感一般。牛油蒜蓉金菇，大量蒜蓉鋪係面，焗完出黎香噴噴蒜蓉味，金菇好入味，食落去感覺到蒜蓉味出晒黎，但覺得金菇份量再多啲就更好，食到底有啲咸。雞翼，味道有啲似譚仔既土匪雞翼，但油偏多。金菇肥牛卷，香口又多汁，味道唔錯～