鐵板燒紗舞縭 (已結業)

真係求其到再冇得求其，行完aeon見到有間鐵板燒，晚飯時間仲要有位咪去試吓囉，坐底阿姐推介有個海陸空餐就試佢，上菜快到你唔信，一叫完就上咗個炒菜，其實我望住佢幾個order一齊做，做多咗一個等人點餐，但係都唔洗咁快，到前菜同湯都食埋都仲要等成10分鐘先有頭盤上，個炒菜都凍哂，頭盤有阿根廷紅蝦同鵝肝，真心要講句阿根廷紅蝦除咗做刺，攞去熟食真係難食到一個點又霉又肉酸，個肝食落粉粉地，應該唔係鴨黎，跟住再黎個洋蔥雞扒，一咬落去真係大開眼界，原來呢個世界真係天外有天 人外有人，記得之前睇地獄廚神，有個參賽者用雞胸做主菜，主題係將件雞胸煮到好似雞脾咁滑，呢度竟然做到呢個效果，將雞脾煮到雞胸咁鞋，當我覺得呢個世界灰到冇得救既時候，師傅遞個牛扒埋黎，可能佢地就係要將你心態搞到谷底既時候，先俾的正常野你食，牛肉眼還可以不過多筋多膏，呢個時候已經冇乜要求食飽就算。