影片
更多
2008-12-24
22 瀏覽
呢間大牌檔喺同區出晒名，因為唔係咁就腳所以都唔會成日嚟，今晚咁啱同屋企人經過，又未食晚飯，當然唔會過門而不入啦！入到去見佢而家興任食打邊爐，啲材料仲係自助添，好鬼吸引！ 不過同行有老人家，又有細路仔，而且我呢個禮拜又打過邊爐又燒過嘢食，所以都係揀咗食小菜，冇咁熱氣，叫咗： 滷水拼盤：呢個拼盤款式幾多，有鵝件、鵝掌翼、腎、千層峰、生腸、紅腸、大腸、墨魚、滷蛋，不過美中不足嘅係個拼盤冇滷水豆腐同花生墊底！滷水鵝件冇誠意，得一片肥肉連皮，唔比好過啦；鵝掌翼同腎滷得好稔，亦好入味；千層峰最好食， 其他嘅就不過不失啦！ 生炒骨：味道甜甜酸酸、肉同骨嘅比例都可以，炸漿亦唔會太厚，入面嘅肉仲保持到有肉汁，唔會炸到乾晒，都幾好味！ 琵琶豆腐：賣相唔錯，雖然好明顯睇到佢啲鯪魚肉並冇用湯羹蒸熟先再炸，但係都力求整齊！呢度嘅琵琶豆腐好食在佢個炸漿有啲雞蛋，除咗令佢嘅外表多咗一層金黃色之餘，亦為食味加添一份蛋香，個豆腐內裡仲要比一般食店軟綿，真係幾正！伴碟墊底嘅菜心亦夠綠夠脆夠甜，呢樣嘢就真係誠意十足嘞！ 避風塘釀雞翼：釀雞翼係用雞中翼去骨連雞翼尖釀入蝦膠做饀料，先走油後再用大量紅椒加炸蒜再翻鑊。可能真係好
呢間大牌檔喺同區出晒名，因為唔係咁就腳所以都唔會成日嚟，今晚咁啱同屋企人經過，又未食晚飯，當然唔會過門而不入啦！入到去見佢而家興任食打邊爐，啲材料仲係自助添，好鬼吸引！ 不過同行有老人家，又有細路仔，而且我呢個禮拜又打過邊爐又燒過嘢食，所以都係揀咗食小菜，冇咁熱氣，叫咗：
滷水拼盤：呢個拼盤款式幾多，有鵝件、鵝掌翼、腎、千層峰、生腸、紅腸、大腸、墨魚、滷蛋，不過美中不足嘅係個拼盤冇滷水豆腐同花生墊底！滷水鵝件冇誠意，得一片肥肉連皮，唔比好過啦；鵝掌翼同腎滷得好稔，亦好入味；千層峰最好食， 其他嘅就不過不失啦！
生炒骨：味道甜甜酸酸、肉同骨嘅比例都可以，炸漿亦唔會太厚，入面嘅肉仲保持到有肉汁，唔會炸到乾晒，都幾好味！
琵琶豆腐：賣相唔錯，雖然好明顯睇到佢啲鯪魚肉並冇用湯羹蒸熟先再炸，但係都力求整齊！呢度嘅琵琶豆腐好食在佢個炸漿有啲雞蛋，除咗令佢嘅外表多咗一層金黃色之餘，亦為食味加添一份蛋香，個豆腐內裡仲要比一般食店軟綿，真係幾正！伴碟墊底嘅菜心亦夠綠夠脆夠甜，呢樣嘢就真係誠意十足嘞！
避風塘釀雞翼：釀雞翼係用雞中翼去骨連雞翼尖釀入蝦膠做饀料，先走油後再用大量紅椒加炸蒜再翻鑊。可能真係好多人客啦，雞翼上枱時已經唔係好熱好脆，不過食落都幾惹味又夠香口； 蝦膠味道唔係太鮮但就幾彈牙，食完個嘴有啲發脹，要飲多啖可樂沖吓先可以繼續！
蒜茸炒豆苗：炒得啱啱好，菜仲好鮮嫩，蒜茸味唔太濃，唔會搶晒菜嘅味道！
黃金四色炒飯：賣相一流，顏色鮮艷，有南瓜，青豆，栗米，仲有櫻花蝦合成四色，啲料粒粒都切得超細粒，師傅嘅刀功唔錯！ 不過啲飯就真係差咗啲嘞，有啲爛又有啲稔，一定唔係隔夜飯！好彩都炒得夠乾身，又唔係太多油咁都加番啲分嘅！
細支裝汽水十蚊三支，抵！我哋飲咗半打！
呢度嘅環境都好似一般大牌檔咁唔係咁企理，地下有水又有啲污糟，招呼都係因為人手唔夠，要有啲耐性等吓，笑容就冇乜架啦，因為埋枱放低啲菜，佢都急急腳要做其他嘢，不過始終都係大牌檔夠鑊氣，啲嘢食真係幾正，下次再嚟試吓佢個自助打邊爐先！
張貼
