三姐廚房私房菜 (已結業)

早兩日WhatsApp訂位，怕星期六多人無位，老板已清楚比足詳細指引。當晚去到，老板又熱情招呼，介紹私房菜外，又介紹同事比我哋識，感覺如上賓一樣。由於我太遲先加訂壽包,老板了預備唔切，竟然送盒朱古力比我哋當禮物，咁已既服務態度,未食已加分。但好戲在後頭,原本諗住私房菜只係真材實料,但估唔到滿有驚喜！幾味頭盆,分量好足，尤其流心蛋茄子嗰汁一絕！再嚟個精緻既帶子波菜容燉蛋白，賣相滿分。原盅燉湯超甜無味精！，兩老都話夠火喉，抵讚。跟住炒蝦球，重點係旁邊既即整糖雕，估唔到6人餸都有咁認真既伴碟裝飾，仲要好味唔太甜，亞女都撳咗好多嚟食。跟住再嚟魚同蟹.蟹既漿汁好味到打包左兩盒返屋企。仲有黑加侖子豚肉，伴碟既藍莓粒粒都包左糖膠,食起嚟脆到有聲.好得意。跟住仲有雞，蚌片,菜，脆卜卜既炒飯，冷熱甜品。超飽，要打包！由於老板想每碟餸都熱辣辣上枱.所以一味上完先再一味，成餐飯竟然食咗三個幾鐘。勁!總括而言，依間係有心，有水準，有質量，服務態度好既私房菜，值得推介。希望佢哋可以一直维持依個水準啦！