劉老太手工餃子

營業中

休息中

意想不到嘅驚喜，本以為同其他餐廳一樣係好食嘅湯餃加味精調配嘅湯底，完全冇諗過餃子好食之餘，嗰湯底好清甜，係老火湯。企係門口，已經有嗰姐姐好熱情咁招呼，見住我拎住勁多野，即刻帶領我去卡位。並且主動問我係咪第一次黎食，我答係之後，佢即刻好用心咁介紹佢哋嘅餐單。我嗌左甘筍粟米豚肉餃+白菜豚肉餃，配上蟲草花雞湯，同埋額外加錢要咗個粉絲底。餃子同屋企手包餃子一樣，味道唔會過份地咸，好食到我有啲後悔冇嗌夠8隻，最震驚我係嗰湯底。湯底顏色濃郁奶白，唔清澈，一睇就知係煲咗好耐，正宗嘅老火湯。一飲落去，直情飲得出，同出面其他餐廳，寫住老火湯，實質係味精滾湯唔同。呢間餐廳嘅老火湯飲落去清甜，粟米味好出，啲料已經煲到好淋，粟米一咬就散。簡直就似係屋企飲嗰啲，阿媽煲嘅老火湯。試完呢次，我絕對會帶朋友黎食多次。可惜，我冇試到呢度既小食，下次再嚟一定會嗌。呢間餐廳除咗提供現金支付，亦可以比alipay，啱晒我呢啲帶好少現金嘅後生女去食。雖然呢度舖位好細，但整體而言，我拎住咁多野，都覺得坐得舒服既。